Чарняўскі Мікалай Мікалаевіч
Пашыраны пошук
Нацыянальная лiтаратурная прэмiя

Нацыянальная лiтаратурная прэмiя


Чарняўскі Мікалай Мікалаевіч
Нарадзіўся 16 студзеня 1943 года ў в. Буда-Люшаўская Буда-Кашалёўскага раёна Гомельскай вобласці. Скончыў вячэрняе аддзяленне філфака Беларускага дзяржаўнага ўніверсітэта. Працаваў у рэдакцыях газеты “Піянер Беларусі”, часопісаў “Бярозка” і “Вясёлка”, на Беларускім радыё.
Друкавацца пачаў у 1958 годзе. Аўтар зборнікаў лірыкі “Чалавечнасць”, “Трывога”, “На плошчы памяці маёй”, “Дажынкі”, “И весною взойду…” сатыры і гумару “Казёл-моднік”, “І не косяць, і не жнуць…”, “Камар на матацыкле”, “Нашто бабе агарод?”, “Лёкса ў люксе”, “Гарэм на балконе”, “У інтэрнэце ёсць усё…”; трох дзесяткаў вершаў і прозы для дзяцей.
Выдаваўся ў Расіі і Польшчы. Пераклаў на беларускую мову творы многіх паэтаў і празаікаў далёкага і блізкага замежжа.
Узнагароджаны медалём Францыска Скарыны, Граматай Вярхоўнага Савета БССР. Выдатнік народнай асветы. Выдатнік друку Беларусі. Заслужаны дзеяч культуры Рэспублікі Беларусь. Лаўрэат Літаратурнай прэміі імя Янкі Маўра (1995), прэміі Федэрацыі прафсаюзаў Беларусі (2001), прэміі імя Васіля Віткі (2002), Літаратурнай прэміі “Залаты купідон” (2010).
Ганаровы член Саюза пісьменнікаў Беларусі. Адзначаны медалём “За вялікі ўклад у літаратуру”. Ганаровы грамадзянін Буда-Кашалёўскага раёна.

На парозе дабрыні і болю

Намінацыя: Лепшы твор літаратурнай крытыкі і літаратуразнаўства (2020)

Аўтар: Чарняўскі Мікалай Мікалаевіч

Выдавецтва: "Народная асвета"

За шэсць дзясяткаў гадоў, пражытых у літаратуры, аўтару гэтай кнігі, вядомаму пісьменніку Міколу Чарняўскаму, пашчасціла сустракацца, быць блізка знаёмым, творча супрацоўнічаць і сябраваць з многімі выдатнымі людзьмі Беларусі, якія занялі пачэснае месца ў роднай літаратуры. Гэта Янка Маўр і Артур Вольскі, Васіль Вітка і Уладзімір Дубоўка, Станіслаў Шушкевіч і Рыгор Барадулін і інш. Літаратурныя партрэты і склалі змест гэтага зборніка. Напісаная жывой гутарковай мовай, не пазбаўленая гумару і прыгод, кніга адкрые чытачу шмат новага, сапраўды цікавага і пазнавальнага. Яна стане карысным дапаможнікам для выкладчыкаў ВНУ, настаўнікаў, студэнтаў, школьнікаў, а таксама для ўсіх, хто цікавіцца беларускай літаратурай.

Набыць кнiгу

Свая ёсць песня…

Намінацыя: Лепшы твор літаратурнай крытыкі і літаратуразнаўства (2021)

Аўтар: Чарняўскі Мікалай Мікалаевіч

Эсэ і літаратурныя партрэты, змешчаныя ў новай кніге пісьменніка Міколы Чарняўскага, знаёмяць з вядомымі паэтамі і празаікамі сучаснага пакалення. Большасць з іх – гэта яго равеснікі, сябры па жыцці і творчасці: Мікола Маляўка, Казімір Камейша, Уладзімір Дзюба, Анатоль Зэкаў, Уладзімір Мацвеенка, Уладзімір Мазго, Васіль Ткачоў і інш. Праўдзіва, з добрым веданнем таго, аб чым апавядае, прыгадвае аўтар таксама далёкую пару свайго супрацоўніцтва з газетай “Піянер Беларусі”, працу ў рэдакцыі часопіса “Бярозка”; узнаўляе гісторыю са знакамітай паэмай “Сказ пра лысую гару”, сустрэчы з яе аўтарам – народным паэтам Беларусі Нілам Гілевічам; дзеліцца ўспамінамі пра кнігу свайго маленства “Ніколі не забудзем”. “Свая ёсць песня…” можа стаць карыснаю для ўсіх, хто цікавіцца беларускай літаратурай, паважліва ставіцца да роднага слова.

Набыць кнiгу