Аўласенка Генадзь Пятровiч
Пашыраны пошук
Нацыянальная лiтаратурная прэмiя

Нацыянальная лiтаратурная прэмiя


Аўласенка Генадзь Пятровiч
"Нарадзіўся 16 жніўня 1955 года ў вёсцы Ліпавец Ушацкага раёна Віцебскай вобласці. Беларус. У 1972 годзе скончыў Ушацкую сярэднюю школу. З 1974 па 1976 год служыў ва ўзброеных сілах. Затым скончыў біялагічны факультэт БДУ. Некаторы час жыў і працаваў у Якутыі і Забайкаллі.

Больш за дваццаць гадоў працаваў настаўнікам Вайнілаўскай базавай школы Чэрвеньскага раёна, дзе выкладаў біялогію і хімію. Затым быў рэдактарам аддзела падлеткавай творчасці часопіса «Маладосць». Член Саюза пісьменнікаў Беларусі з 1999 года. З 2014 года галоўны рэдактар часопіса «Бярозка».

Жыве ў Чэрвені (Мінская вобласць). Жанаты, мае двух дзяцей.

Пісьменніцкай дзейнасцю пачаў займацца даволі позна. Спачатку гэта была выключна паэзія (рускамоўная, затым беларускамоўная), з сярэдзіны 1990-х гадоў захапіўся драматургіяй. П’есы Генадзя Аўласенкі станавіліся лаўрэатамі трох першых рэспубліканскіх конкурсаў беларускай драматургіі, гучалі па беларускаму радыё, друкаваліся ў рэспубліканскіх часопісах і калектыўных зборніках.

Прозу пачаў пісаць значна пазней. Спачатку гэта быў цыкл невялікіх беларускамоўных апавяданняў пад агульнай назвай: «На мяжы рэальнага і фантастычнага». Апавяданні гэтыя неаднаразова друкаваліся ў часопісе «Маладосць», штотыднёвіку «ЛіМ», газетах «Звязда», «Голас Радзімы», «Настаўніцкая газета». Адно з апавяданняў у 2007 годзе стала пераможцам конкурсу апавяданняў, які штогод праводзіць газета «Звязда». У 2008 годзе ў выдавецтве «Каўчэг» выйшаў фантастычны раман «Гісторыя замест матэматыкі».

Шмат піша для дзяцей. Творча супрацоўнічае з дзіцячымі часопісамі: «Вясёлка», «Бярозка», «Рюкзачок». Дзіцячыя вершы, казкі і п’есы Генадзя Аўласенкі неаднаразова гучалі па беларускаму радыё, друкаваліся на дзіцячых старонках часопісаў «Алеся», «Родная прырода», «Лесавічок» і інш.

Казкі Генадзя Аўласенкі ўвайшлі ў зборнікі казак «Чароўныя пацеркі» і «Вежа міру», якія ў 2006—2007 г.г. выйшлі ў «Мастацкай літаратуры», а таксама ў казачны цыкл выдавецтва «Літаратура і Мастацтва»: «Чырвоная кніга ў казках і вершах» (2007 г.); «Лясная кніга ў творах беларускіх пісьменнікаў» (2008 г.); «Блакітная кніга ў творах беларускіх пісьменнікаў» (2009 г.).

Бiблiяграфiя:

  • «Дзіўныя прыгоды маленькага Ветрыка з Вентылятара» (2009)
  • «Вася Лайдачкін у Краіне Шкодных Звычак» (2009)
  • «Дзікія кошкі Барсума» (2009)
  • «Новыя прыгоды маленькага ветрыка з вентылятара» (2010)
  • «Палонныя чорнага лесу» (2011)
  • «Ветрык і спадарыня Зіма» (2012)
  • «Ветрык і Пацучыны кароль» (2014)

Колькі колераў у лета?

Намінацыя: Лепшы твор для дзяцей і юнацтва (2018)

Аўтар: Аўласенка Генадзь Пятровiч

Мастак Алена Карповіч

Выдавецтва: Выдавецкi дом "Звязда"

Колькасць старонак: 368

У кнізе беларускага пісьменніка Генадзя Аўласенкі юныя чытачы знойдуць шмат карыснай і цікавай для сябе інфармацыі: і па гісторыі, і па геаграфіі, і па біялогіі… Але ўсё ж асноўнае ў ёй – казкі! Самыя разнастайныя: пра звяроў і птушак, пра рыб і нават пра лясныя расліны. Гэтыя казкі расказвае ім сам дзядуля Дняпро. А некалькі казак для дзяцей прынёс у сваім маленькім кошыку нават … Вожык. Ён іх у лесе назбіраў… А пра што аўтар не сказаў у казках, прачытаеце ў вершах.

Набыць кнiгу